Wednesday, July 06, 2005

مصر مش كده

عشان خاطر مصر وعيون مصر وعشان نرد على الإعلان التسويقي المادي الاناني المغاير للحقيقة...كتبت هذه القصيدة ويا رب تعجبكم
مصر مش كده


من جوة جرن القمح هاتي الصور يا وداد
بقى ليها عازة وفرجي الأولاد

الصورة دي بهية والنهار نهارين
واحد في منديلها والتاني جوة العين
والعين بصيرة وكلنا عارفين
بس الأيادي لسة برضه شداد

من جوة جرن القمح هاتي الصور يا وداد
بقى ليها عازة وفرجي الأولاد

بعد الكلام اللي تقال ف التلفزيون
عن البكيني وغطّيني وعن ناس بقروون
لو مستمع طبعا عاقل ح يقول ده جنون
ولا يرضى مصر تكون بيعة ف ايدين أوغاد

من جوة جرن القمح هاتي الصور يا وداد
بقى ليها عازة وفرجي الأولاد

بقى دي يا ناس مصر الحرة بنت الثورة
ليه بس عايزين يبيعوكي للناس برة
ده أنت الأميرة وعارفينك كل الامرا
و كفاية بس نجيب سيرتك النور ينقاد

من جوة جرن القمح هاتي الصور يا وداد
بقى ليها عازة وفرجي الاولاد

مصر الجميلة ف عيوننا احلى ما فيها
قلوب تسبح بخالقها واللي حاميها
يا رب احرس لنا بارك الخير ليها
واجعل نهارها ولياليها كلها أعياد

من جوة جرن القمح هاتي الصور يا وداد
بقى ليها عازة وفرجي الاولاد

Eskandrani July 2005

10 comments:

بنت مصرية said...

بارك الله فى اولادك يا مصر

لسه فى قلب بيقدر يقول شعر

لسه البلد دى فيها احساس ومشاعر وكلام ينقال

شكرا يا اسكندرانى،

يا ريت تبعت القصيدة تتنشر بردو فى مصر مش كده

shady said...

اصلهم كانوا قوادين فى الاصل
علشان كده عاوزين يسوقوا مصر
وتقول ايه بقا يا عم اسكندرانى فلى معندوش اصل

Anonymous said...

BY THE WAY DONT FORGET TO MAKE AN DVERTISMENT ABOUT EGYPT ON IQRA2 FEH MO7AGBEEN BE GALALEEB BIBALBTO FE EL MYA FE KAFR EL SHEIKH HEEEE DI SHARM EL SHEIKH YA GAHALA (BY THE WAY AGAIN THE ADVERTISMENT WAS PERFECT WI TOZ FEK)

ابن مصر said...

ابه الحلاوة دي ياعمي اتحفنا اكتر لو سمحت

sydalany-وش مكرمش said...

الصورة دي بهية والنهار نهارين
واحد في منديلها والتاني جوة العين
والعين بصيرة وكلنا عارفين
بس الأيادي لسة برضه شداد

دي شعر و الباقي زجل
بس مش أي زجل
زجل لواحد خد ع الكتابة و بقرا كتير وعدى تحت عينه الأبنودي و جاهين

ده رأي واحد بيكتب شعر


أما رأيي في الموضوع فولاد ال... ثبتوا الصورة ف دماغ البقر من العرب لإن مش حيقتنع بالإعلان ده غير البقر اللي بنشوقهم داخلين البارات و الكباريهات في مصر

ملحوظة لو عاوز تقرا شعري بس أعملي بوست على البلوجر بكده و أنا أعمل بلوجر مخصوص أصلى مش عاوز أحط شعري من غير م الناس تقراه و تعلق

eskandarany said...

منتهى السعادة ان على الاقل في حد بيقرا ويفنط اللي بينكتب .......... ولذلك اشكرك على الملاحظة واتمنى اقرا حاجة ليك قريب بس ابقى قول ح تنشرها فين

sydalany-وش مكرمش said...

نشرت ع البلوج تالت قصيدة عامية أكتبها ف حياتي
لي الشرف تقراها و تنقدها

sydalany-وش مكرمش said...

ملحوظة تالريخ كتابتها مكتوب تحتها

Anonymous said...

Set up a protest against terrorism tomorrow in the streets of Cairo. Do it. Call everyone you know, join together, link up this Egyptian blogosphere and to the streets.

Karim Elsahy

Anonymous said...

if you feel like doing something here is ur chance as Karim says

"Stop complaining about others and realize your own apathy. Tomorrow the 24 of July at 5:30pm on the 6 of October bridge between Zamalek and Tahrir. There will be banners available but you are encouraged to bring your own. It should last until sunset.
This is not for foreign media. This is to send a message to elements in our own communities. We need to tell these bastards that they are not welcome here.
Keep it decent. Park your cars in Zamalek, Don't bother traffic and stay civilized.
Wear white tee shirts. "
http://onearabworld.blog.com/267610/