اسكندراني

Wednesday, August 31, 2011

ضد الوقيعة بين عنصري الوطن

يا ايد الخيانة يا عقل الدمار
يا مش مصري أصلاً وطبعاً حمار
يا دون أي ملة يا مولود بعلة
يا ترجع يا الا اطخك عيار
*****
ما فيش حد قال لك ده شئ مستحيل
توقع مابينا .. تولع فتيل
وتعملها فتنة ..تفوت جوة بيتنا
ده كان غيرك اشطر يا أحمر حمار
*****
ماحدش قرا لك تاريخنا اللي فات
ما قالش في سبيلها كام مصري مات
لا فرقت ديانة ولا مين كان معانا
عاش الكل يحلم بيوم الانتصار
*****
أرواح ولادنا والمجروحين
بيزيدوا فينا اصرار ووعد
ح نرد حق الطاق طاقين
تقوى الايدين نفضل لبعض
ولو بعد حين ورغم الأنين
بينا وبينهم فرقة وتار

Sunday, August 21, 2011

رسالة الى الصهاينة...

تراجعوا... تراجعوا فالشعب خرج بأجمعه
لا يخشى ان حرق العلم لم يبقى قمع يمنعه
فتحسَبوا... وتهيأوا.... ما عاد شيئٍ يشفعُ
قد جاء يوم تكرهونه يا أهل صهيون فأسمعوا

هذا هتاف شعبها وصلاة حزنٍ تُرفعُ
على شهيد لن تجد في الارض منه أشجع
بالدم عطر رمله قد حلف أن لا يرجع
فلا عزاء ولا بكاء فالثأر وحده يشبع

سقط القناع وزلزلت أرض بجيش يسرعُ
آت اليكم ليس بداً من أن تهابوا وتجْزَعوا
آت وفي ايديه سيف للقلب حتما ينزِعُ
فاليوم ثأر عن سنيينٍ طالت وثمنٍ يُدفعُ

يا أمةً عربيةً..... حان الميعاد فجمِعوا
كل الأيادي فكلما ضمت يخافوا ويفجعوا
فلطالما دعموا الشقاق ووتفننوا وتصنعوا
فالأمس صمت وانكسار واليوم حق يُرجع
اسكندراني 21 أغسطس 2011

Tuesday, July 12, 2011

سأظل أعيش

سأظل أعيش ما دمت بقلبك تذكرني
ستظل البسمة في شفتاك تذكرني
بعيون تبعث في الشوق
بحنان يرمي الي بطوق
ينقذني من أهوال فراق
كادت ساعاته تقتلني
سأظل أعيش ما دمت بقلبك تذكرني

سأظل أعيش وفي قلبي بعض حكايات
عن عشق بين نسيم صباح وليل آهات
عن ضحك يملئ أرجاء كل الحجرات
عن قطع نقود وبعض ورود
مازال عبيرها يغمرني
سأظل أعيش ما دمت بقلبك تذكرني

ستظل عيونك ترشدني نحو الشطئان
تحرسني من موج عالي الى بر أمان
سيظل المرسى هو قلبك
وعيونك قمرلا تدرك
أني من دونك لا أملك أمل لحياتي يقربني
سأظل أعيش ما دمت بقلبك تذكرني

سيظل مكانك في قلبي يحمل اسمك
لا يجرأ أحد أن يعبث أو يختصمك
أنت الأول رغم الأقدار
مالك عرشك رغم الثوار
وأنا شعب حر يختار لاأرض بغيرك يحكمني
سأظل أعيش ما دمت بقلبك تذكرني

Wednesday, February 16, 2011

ثورة 25 يناير

ثورة
( فبراير 2011)
ثورة ثورة حتى النصر
ثورة في كل شوارع مصر
ثورة نضيفة ثورة شريفة
مالهاش دعوة بحرق وكسر
ثورة ثورة حتى النصر

ثورة بدأها شباب الورد
نبض الأمة وطين الأرض
جوة قلوبهم حلم بلدهم
جوة عيونهم صورة مصر
ثورة ثورة حتى النصر

ثورة وحلفوا يمين الله
مش طالبين ولا مال ولا جاه
حلم حياتهم يملى بيوتهم
عدل وخير وكرامة وطهر
ثورة ثورة حتى النصر

ثورة ودم الشهدا علمها
مصر ناديتهم سمعوا كلامها
وهبوا حياتهم رفعوا رياتهم
موتهم زلزل كل القصر
ثورة ثورة حتى النصر

قصيدة بدأت كتابتها قبل أكثر من شهرين من ثورة 25 يناير وأنتهيت منها أثناءها

قلة أدب
قلة أدب .. هيصة وشغب
وعيال بتهتف ف الشوارع م الغضب
وناس كتير مش فاهمة ايه حتى السبب
واحد بيضحك م الهموم
واحد بيبكي ومكتئب
وأنا حيرتي فاقت كل دول
ما أنا أصلي عارف نفسي مش ح أسكت ح أقول
ح يجرى ايه ...ح ييجي أكتر من ده ايه
حتى اللي كان معدول في يوم فجأة اتقلب
قلة أدب... قلة أدب
يا ناس وظيفة بقرش صاغ لله
شريطين دوا ومية زي الناس
أربع حيطان... ده اللي ب أترجاه
ولا الفقير... ف البلد ينداس
سيبونا نحلم حلمنا ببلاش
مستكتريين علينا ليه الحلم
ما كتير حلمنا بحلمنا ولا جاش
وكتير رضينا بالقليل والهم
سيبونا نهتف... جايز نموت م التعب
قلة أدب... قلة أدب
ما عادش فيه برقع حيا ولا في خشى
الهبش على عينك وع المفضوح
وكروش على الدنيا مكوشة
من ملوها النتانة تفوح
باعوا الضمير باعوا المصير والأرض
باعو المثل باعو الشرف والعرض
والخوف زحف والصمت أصبح فرض
لا حد قال مش كده
ولاحد حتى عتب
قلة أدب... قلة أدب
شفافية قال... وأنا يعني كنت ب أشوف
مخلوق ضعييف عايش وبأتمنى
أحلام كلام ومزوقينها حروف
يا أصدق غصب عني يا استنى
زهقنا م الوعود والكذب
حبة لصوص أنشأوا لهم حزب
مفروض علينا من زمان بالغصب
الاسم وطني وهو يالا العجب

قلة أدب... قلة أدب

Saturday, June 10, 2006

انتخابات.. انتخابات

محاولة شعرية ... على درب الشاعر أحمد فؤاد نجم

أنا المرشح وحياتي
مكرسة لانتخاباتي
واهم شئ من وجباتي
اكبش وألملم ف الاصوات
الله الله يابلدي ..حتي الاموات

ما يهمكوش م البرد يا ناس آدي بطاطيني
بس المهم يكون اصواتكوا تغطييني
وأي حد عامللي شريف ..يورييني
ملعون ابوه عايش شحات ويموت شحات

الله الله يابلدي دي الناس بقرات

أنا مستقل لكن طبعاً راجل وطني
عايش في خيره وساندني ومظبطني
لا حد يقدر يأذيني ولا يخبطني
ما يغركوش اللي ب أقوله كلها شعارات

الله الله يا بلدي يحيا الحركات

الكلب رمزي ولونني ما بهوهوشي
مقطوع لساني بأمر الحزب وما جادلشي
يعني اللي عايزه جناب البيه لازم يمشي
وقت اللزوم أرفع أيدي حسب الأشارات

الله الله يا بلدي يحيا البدالات

أخر كلامي ومش عايز أي لماضة
الدنيا ماشية بالمعكوس حسب العادة
ح تقول حرامي وحللانجي وحبة زيادة
حلانجي بس أعيش مستور وسط البشوات

الله الله يا بلدي ومليش طلبات

اسكندراني نوفمبر 2005

Tuesday, May 16, 2006

عيّطي يا بهية على الشهدا

عيّطي يا بهية على الشهدا طيارة وعبارة واوتوبيس
ماهو كل يومين نسمع نقرا أخبار سودا ونحلم كوابيس
خد عندك قال قطر يوللع والناس قاعدين من غير فوانيس
طيارة ف أمريكا تودع أرواح مدفونة ف بحر غطيس
طب فين الصندوق الأسود قال يابني بلاش فتوْ وتهجيص
مش احنا اللي نبيع ف عيالنا طب مين ب يبيع لطفك يا مغيث
وبقينا أرخص مخاليق ف الكون بيلموا جتتنا ف حتة كيس
ولا أحنا عشان 70 مليون شايفين اننا عايزيين تخسيس
وده ليه معرفش يا ناس حالنا مايل وعليه ناصبين متاريس
كل ما نيجي نشد ف حيلنا يطلع لنا واحد م الأباليس
وآخرها كمان جات عبارة هلكانة وماشية بدون تراخيص
وصاحبها مظبط ف أموره مسنود بحصانته واطي خسيس
قطفت أرواح ألف وحبة وابن الكلبة طايح ف باريس
طب فين حكومتنا المحترمة ضارباها صرمة وهاتك تعريص
ما يا بخت ان كان البيه خاله يبقى حلاله ياكل ويهيص

وياحسرة يا مصر على الشهدا موضوع يهدا ويروحوا فطيس
عيّطي يا بهية على الشهدا طيارة وعبارة واوتوبيس

اسكندراني مارس 2006

Wednesday, March 22, 2006

مبروك يا عريس

يا أخوانا ايه ده مالكومشي حق
غاويين مناهدة بين آه و لأ
الواد خطب شّرف وطب
موضوعه كله مش مستحق

يا أخوانا ايه ده مالكومشي حق

يمكن يكون ده ف مصلحتنا
الجو ياخده ينسى حكايتنا
ينس الرياسة لجنة سياسة
تاخده الحساسة ويعيش في شق

يا أخوانا ايه ده مالكومشي حق

مبروك عليه يفرح بقى
بعد اللي شافه غلب وشقى
وظروفه ربكة جاب حق شبكة
وبالمشاركة زاقينه زق

يا أخوانا ايه ده مالكومشي حق

عقبال ما يفرح ويجيب عيال
ويسمي مودي سوزي وجمال
والجد يفرح يقعد يرحرح
ما يهمهوش لو شعبه طق

يا أخوانا ايه ده مالكوشي حق

اسكندراني 22 مارس 2006

Thursday, September 29, 2005

يا مصر

يا مصر

أما يا مصر صحيح غلبانة
يوم تتعشي وعشرة جعانة
وبتتغطي بناس بتوطّي
لما غرقتي في بحر خيانة

أما يا مصر صحيح غلبانة

أما يامصر عليكي حكومة .. غش ف غش
بتبدل في اليوم الواحد .. مليون وش
وبتستعبد ...شعبك تجلد
قهر وذل وخوف واهانة

أما يا مصر صحيح غلبانة

أما يا مصر عليكي رئيس.. مش متأخر
ان يسيب في كلابه تهيص ..وهو يشخر
لما الخير في ايديكي اتبخر
راح امريكا خدله اعانة

أما يا مصر صحيح غلبانة

لسه يا مصروشعبك ساكت...كاتم غلبه
امتى يا مصر ح يفهم ان بحقه يطالبه
خايف لاحسن نومه يغالبه
يصحى يلاقي الناس عريانة

اصحي يا مصر الناس نيمانة

أسكندراني سبتمبر 2005

Monday, September 12, 2005

فتح عينك من غير ملبن

عارفين إيه المهم دلوقت بعد ما الفوز الكاسح لمبارك........... المهم إننا ما نروحش في النوم ونستنى انتخابات 2011 ..لأ ..المهم اننا ننسى الاسامي ونحاول نفترض الاحسن ونشوف ايه ح يتنفذ من برنامج الرئيس وايه مش! وبعدين نفضل وراه لحد ما يتنفذ أو تيجي سنة 2011 ايهما أقرب وده بجد عشان لو فضلنا في موضوع تزوير انتخابات ومسرحية الحزب ومين عمل ومين ما عملش برضه ح تيجي سنة 2011 واحنا زي ما أحنا ...........خللينا نكون عمليين أكتر وتعالوا نتابع ما سيحدث ونكون الرقيب الغلس على تنفيذ الوعود وجايز يكون بكرة احسن من امبارح .......الامل يا أخونّا الامل.
أنا عارف ان الناس ح تقول أمل إيه وبتاع إيه بس ده واقع ولازم نستغله لمصلحتنا ..يا إما ناخد حقوقنا وساعتها نقول للحزب شكراً وعفا الله عما سلف أو نكون جهزنا نفسنا ووضحنا الحقيقة للناس كلها ويبقى فيه 50 مليون واحد يصوت في الانتخابات الجاية مش 6 مليون حزب وطني. لازم نعترف ان التجربة جديدة علينا وان الناس لسة مش قادرة تحس بقيمة مشاركتها وده ماكنش ح يتحقق المرة دي بأي حال بس ممكن يكون المرة دي بداية انه يتحقق المرة الجاية عشان كده مش عايزيين نفرط في الوقت ونستغله جداً والميه تكدب الغطاس بس المهم نعوم مش نلعب في الرملة ع الشط زي كل مرة

حد ح يراقب معايا .....حد ح يفكر عملي؟؟؟؟؟؟؟ بسم الله الهادي

Wednesday, September 07, 2005

وحشتوني

أول كلامي وحشتوني.....بعد اجازة استمرت 40 يوم أنا راجع وكلي شوق ...اكتب ...أحكي...أقول ....أدوب من تاني في وسطكم......وحشتوني

Sunday, July 24, 2005

شرم الشيخ

البقاء لله .........في الضمير والكرامة والإيمان والانتماء.............. الحزن ماليني بالرغم من الإرادة القوية على الصمود والإيمان بقضاء الله................. بس بجد مافيش نفس للكلام. يا خسارة يا مصريين

البحر بيضحك ليه
وانا نازله ادلع املا القلل

البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل

مساكين بنضحك من البلوة
زي الديوك و الروح حلوة
سارقاها من السكين حموة
و لسة جوا القلب أمل

والبحر بيضحك ليه … ليه
وانا نازلة ادلع املا القلل

من قصيدة نجيب سرور

Wednesday, July 06, 2005

مصر مش كده

عشان خاطر مصر وعيون مصر وعشان نرد على الإعلان التسويقي المادي الاناني المغاير للحقيقة...كتبت هذه القصيدة ويا رب تعجبكم

مصر مش كده

من جوة جرن القمح هاتي الصور يا وداد
بقى ليها عازة وفرجي الأولاد

الصورة دي بهية والنهار نهارين
واحد في منديلها والتاني جوة العين
والعين بصيرة وكلنا عارفين
بس الأيادي لسة برضه شداد

من جوة جرن القمح هاتي الصور يا وداد
بقى ليها عازة وفرجي الأولاد

بعد الكلام اللي تقال ف التلفزيون
عن البكيني وغطّيني وعن ناس بقروون
لو مستمع طبعا عاقل ح يقول ده جنون
ولا يرضى مصر تكون بيعة ف ايدين أوغاد

من جوة جرن القمح هاتي الصور يا وداد
بقى ليها عازة وفرجي الأولاد

بقى دي يا ناس مصر الحرة بنت الثورة
ليه بس عايزين يبيعوكي للناس برة
ده أنت الأميرة وعارفينك كل الامرا

و كفاية بس نجيب سيرتك النور ينقاد

من جوة جرن القمح هاتي الصور يا وداد
بقى ليها عازة وفرجي الاولاد

مصر الجميلة ف عيوننا احلى ما فيها
قلوب تسبح بخالقها واللي حاميها
يا رب احرس لنا بارك الخير ليها
واجعل نهارها ولياليها كلها أعياد

من جوة جرن القمح هاتي الصور يا وداد
بقى ليها عازة وفرجي الاولاد

Eskandrani July 2005

Wednesday, June 29, 2005

كوندوليزا

خطوة عزيزة يا كوندوليزا
مبعوثة الوالي الهمام
يا فايتة منغير حتى فيزا
ودايسة على الراس والمقام

فرحنا لما قالولنا جاية
كنسناهالك رشينا مية
والكل وطى باس واستغطى
حتى المعارضة حيوا المدام

دستور يا حراس القام

الخطة ماشية زي الاوامر
ح نشيل حمادة ونحط تامر
ولو حد فكر أو حتى غامر
ح نسد بقه من غير كلام

دستور يا حراس القام

دستورنا لازم ح ندرسوا
ح نقللعوا ونلبسوا
والشعب لو ثار نحبسوا
ونهرسوا تحت الترام

واهو نبقى خففنا الزحام

دستور يا حراس القام

والشعب حر يهتف ينادي
واحنا طبيعي لازم ندادي
واما تشاوري ح نجيب مغاوري
ونلم فيهم زي الحمام

ونعيش سعادة ونعيش سلام

أصحوا يا حراس المقام
أصحوا يا حراس المقام

اسكندراني - يونيه 2005

Monday, June 06, 2005

حد فاهم أي حاجة؟

حد فاهم أي حاجة م اللي داير؟
حد واخد باله ايه بس اللي صاير
حبة يمشوا ع اليمين
حبة مش متأكدين
والأكادة آه يا سادة
شعبنا هو اللي حاير

حد فاهم أي حاجة م اللي داير؟

دولا دولا مش عاجبهم
أما دولا ايه اللي جابهم
آه ودول أيدهم ف جيبهم
مرصوصين زي الشكاير

حد فاهم أي حاجة م اللي داير؟

عايز أبقى ويا حد
حد سامع ؟ حد رد؟
حد حب مصر جد
مش كلام في الجو طاير

حد فاهم أي حاجة م اللي داير؟

أحنا مش بنقول كفاية
برضه مش ويا الولاية
فهمونا أيه الحكاية
واحنا ح نسّوي الهوايل

حد فاهم أي حاجة م اللي داير؟

يونيو 2005

Saturday, May 28, 2005

قصيدة قرد وأسد

القرد قرد لو له بلــــــــــــد
مهما انجـــعص ولا انفــرد
ح يعيش جبان جوة الببان
ويموت وعقــــــــدته الاسد

ماهو اصله قرد ومش أسد

الموز أساس لمـــــــــــبدأه
يندغ وقـشـــــره يفــــرقه
ياكل كتير ويعيش أمــــير
وكأنه عـايش للأبــــــــــد

مع انه قرد ومش أسد

قالوا زمان عليه حكــــــــيم
عالم ويفتي ف الصمــــــيم
ويقول كلام عنتر همـــــــام
صادر بمرسوم معتـــــــــمد

ماهو اصله قرد ومش أسد

اصل الحقــــــيقة المزهلة
انه اتربــــط في السلسلة
مالهوش خيار في الاختيار
مزلول بـــيستنى المـــــــدد

ماهو اصله قرد ومش أسد

ملعون ابوه من انهي ملة
ومنين جابوه ابن الغوريلا
ما سألنا حد غير قال ورد
ايش جاب لجاب قرد وأسد

عايزيين أسد.. عايزيين أسد

Saturday, May 21, 2005

سنة تانية كتابة

في ليل مجروح ونور غايب
في وسط الضلمة صوت الآه
بيـــــنده قـلبي ع الغــــــايب
ترد الـتـــوهة مـش لاقيـــــاه
يعود الصوت يقول قـلـــــبي
ما شوفـتـش حد غيري ناداه
يرد الصـــــــوت ولا يخبي
يا قلبي مـسـتــــــحيل تلقاه

حبيب القلب انا مجروح
وامتى تـنــتهي جروحي
سنين فاتت سنين بتروح
ومشلاقي حبيب روحي
سنين ضاعــت وانا لسه
معـــــاه تايه بلا مرسى
وليه توعـــــد وليه تبعد
وليه تعـــــند وليه تأسى

وليه يا دنيـــــــــا فراقة
حرام دي قلوبنا مشتاقة
وبحلم يوم ما نتـــــلاقى
يكون بينــــا أمل وحياه

يا قلبي حرام ما تتـــــــــكلم
وقولها بأعلى ما ف صوتك
وايه ذنبــــك بتتــــــــــــــألم
وتبكي حتى ف سكــــــوتك
وهــو بعــــــــيد ولا داري
ولا عايز يعـــــــــود داري
تـزيد ناري وأفكــــــــــاري
وابات واصحى في حيرة وآه

وليه يا دنيـــــــــا فراقة
حرام دي قلوبنا مشتاقة
وبحلم يوم ما نتـــــلاقى
يكون بينــــا أمل وحياه

1996

Thursday, May 19, 2005

سنة أولى كتابة

لملمي كفوفك وضمي جوة قلبك قلبي انا
وافتحي عيونك وسمّي ده الطريق مرسوم لنا

لملمي كفوفك تعالي بالقى في كفوفك حنان
خللي نور قمرك يلالي حتى لو فات الاوان
الهوا مكتوب علينا
متقوليش انه بايدينا
لو بعدنا او نسينا
برضه احنا لبعضنا

ضللي علينا وخدينا وارحمينا م العذاب
غيري النظرة الحزينة أأمري امرك مجاب
امسحي الدمع ف عيونك
ارفضي الشك وظنونك
قلبي عمره ما كان يخونك
لو تغيبي مييت سنه

لملمي كفوفك وضمي جوة قلبك قلبي انا
وافتحي عيونك وسمّي ده الطريق مرسوم لنا

1995

Sunday, May 15, 2005

بقرة حاحا – أحمد فؤاد نجم

ناح النواح والنواحه على بقرة حاحا النطاحه

والبقره حلوب حاحا تحلب قنطارحاحا

لكن مسلوب حاحا من أهل الدارحاحا

والدار بصحاب حاحا وحداشر باب حاحا

غير السراديب حاحا وجحور الديب حاحا

وبيبان الدارحاحا واقفين زنهارحاحا

وف يوم معلوم حاحا عملوها الروم حاحا

زقوا الترباس حاحا هربوا الحراس حاحا

دخلوا الخواجات حاحا شفطوا اللبنات حاحا

والبقرة تنادي حاحا وتقول يا ولادي حاحا

وولاد الشوم حاحا رايحين فى النوم حاحا

البقرة إنقهرت حاحا فى القهر إنصهرت حاحا

وقعت فى البيرحاحا سألوا النواطير حاحا

طب وقعت ليه حاحا وقعت م الخوف حاحا

والخوف ييجي ليه حاحا من عدم الشوف حاحا

وقعت م الجوع ومن الراحه البقرة السمرا النطاحه

ناحت مواويل النواحه على حاحا وعلى بقرة حاحا

Monday, May 09, 2005

مسير الضي لوحده هيلمع

إهداء إلى روح نابغة السينما المصرية .. النمر الأسود ..... أحمد ذكي ..... " مسير الضي لوحده هيلمع" من فيلم هيستريا وهذه الكلمات للشاعر فؤاد حداد

ان ماعرفتش تضحك

ماتدمعش.. و لا تبكيش

و ان مافضلش معاك غير قلبك

اوعي تخاف مش حتموت..هتعيش

و ان سالوك الناس عن ضي

جوه عيونك مابيلمعش..ماتخبيش

قولهم العيب مش فيا ده العيب في الضي

و انا مش عاشق ضلمه و لا زعلت الضي

مسير الضي لوحده هيلمع

مسير الضحك لوحده هيطلع

مابـيجرحش و لايأذيش