عيّطي يا بهية على الشهدا طيارة وعبارة واوتوبيس
ماهو كل يومين نسمع نقرا أخبار سودا ونحلم كوابيس
خد عندك قال قطر يوللع والناس قاعدين من غير فوانيس
طيارة ف أمريكا تودع أرواح مدفونة ف بحر غطيس
طب فين الصندوق الأسود قال يابني بلاش فتوْ وتهجيص
مش احنا اللي نبيع ف عيالنا طب مين ب يبيع لطفك يا مغيث
وبقينا أرخص مخاليق ف الكون بيلموا جتتنا ف حتة كيس
ولا أحنا عشان 70 مليون شايفين اننا عايزيين تخسيس
وده ليه معرفش يا ناس حالنا مايل وعليه ناصبين متاريس
كل ما نيجي نشد ف حيلنا يطلع لنا واحد م الأباليس
وآخرها كمان جات عبارة هلكانة وماشية بدون تراخيص
وصاحبها مظبط ف أموره مسنود بحصانته واطي خسيس
قطفت أرواح ألف وحبة وابن الكلبة طايح ف باريس
طب فين حكومتنا المحترمة ضارباها صرمة وهاتك تعريص
ما يا بخت ان كان البيه خاله يبقى حلاله ياكل ويهيص
وياحسرة يا مصر على الشهدا موضوع يهدا ويروحوا فطيس
عيّطي يا بهية على الشهدا طيارة وعبارة واوتوبيس
اسكندراني مارس 2006
5 comments:
على فكرة انته كلماتك كلها صادقة وحسيت بها لما قراتها وعاوزين نقرا احسن من كدا يا اسكندرانى يا ابن عمى وانا احيك على هذة المدونة الجميله
ده أكتر من ما أستحق ويا رب يقدرني أني افضل أقول على طول
tamam keda ya ma3lem ;)
رائعة جدا جدا جدا جدا جدا جدا جدا
بصراحة عاجبني اوي الشعر بتاعك عشان كدة ، بعد اذنك انا حطيت لينك لمدونتك علي المدونة بتاعتي
www.negma.blogspot.com
ولو عندك اي اعتراض او تعليق ممكن تبلغني بي علي esraasamir22@hotmail.com
و شكرا
Post a Comment