حبة هدووء نهدى ونفوق
سايق عليك الوطن
حس الوطن مخنوق
سايق عليك الشوارع
وريحة الحلم اللي ضايع
وحضن الدفى اللي سايع
وقت الغروب والشروق
سايق عليك الحواري متعطرة بالفل
وبيوت على صغرها بتلم شمل الكل
وليالي متزوقة فيها القمر بيطل
... بتزف غناويها عاشق على معشوق
سايق عليك الوطن خللي الوطن يقوى
مش وقت مين ابتدى ولا وقت مين أقوى
ده وقت كل الايدين يتجمعوا عزوة
ويصبوا حلو الامل تسري الحياه ف العروق
سايق عليك الوطن
حس الوطن مخنوق

وليد شلبي يوليو 2012