يا مصر

يا مصر

أما يا مصر صحيح غلبانة
يوم تتعشي وعشرة جعانة
وبتتغطي بناس بتوطّي
لما غرقتي في بحر خيانة

أما يا مصر صحيح غلبانة

أما يامصر عليكي حكومة .. غش ف غش
بتبدل في اليوم الواحد .. مليون وش
وبتستعبد ...شعبك تجلد
قهر وذل وخوف واهانة

أما يا مصر صحيح غلبانة

أما يا مصر عليكي رئيس.. مش متأخر
ان يسيب في كلابه تهيص ..وهو يشخر
لما الخير في ايديكي اتبخر
راح امريكا خدله اعانة

أما يا مصر صحيح غلبانة

لسه يا مصروشعبك ساكت...كاتم غلبه
امتى يا مصر ح يفهم ان بحقه يطالبه
خايف لاحسن نومه يغالبه
يصحى يلاقي الناس عريانة

اصحي يا مصر الناس نيمانة

أسكندراني سبتمبر 2005

فتح عينك من غير ملبن

عارفين إيه المهم دلوقت بعد ما الفوز الكاسح لمبارك........... المهم إننا ما نروحش في النوم ونستنى انتخابات 2011 ..لأ ..المهم اننا ننسى الاسامي ونحاول نفترض الاحسن ونشوف ايه ح يتنفذ من برنامج الرئيس وايه مش! وبعدين نفضل وراه لحد ما يتنفذ أو تيجي سنة 2011 ايهما أقرب وده بجد عشان لو فضلنا في موضوع تزوير انتخابات ومسرحية الحزب ومين عمل ومين ما عملش برضه ح تيجي سنة 2011 واحنا زي ما أحنا ...........خللينا نكون عمليين أكتر وتعالوا نتابع ما سيحدث ونكون الرقيب الغلس على تنفيذ الوعود وجايز يكون بكرة احسن من امبارح .......الامل يا أخونّا الامل.
أنا عارف ان الناس ح تقول أمل إيه وبتاع إيه بس ده واقع ولازم نستغله لمصلحتنا ..يا إما ناخد حقوقنا وساعتها نقول للحزب شكراً وعفا الله عما سلف أو نكون جهزنا نفسنا ووضحنا الحقيقة للناس كلها ويبقى فيه 50 مليون واحد يصوت في الانتخابات الجاية مش 6 مليون حزب وطني. لازم نعترف ان التجربة جديدة علينا وان الناس لسة مش قادرة تحس بقيمة مشاركتها وده ماكنش ح يتحقق المرة دي بأي حال بس ممكن يكون المرة دي بداية انه يتحقق المرة الجاية عشان كده مش عايزيين نفرط في الوقت ونستغله جداً والميه تكدب الغطاس بس المهم نعوم مش نلعب في الرملة ع الشط زي كل مرة

حد ح يراقب معايا .....حد ح يفكر عملي؟؟؟؟؟؟؟ بسم الله الهادي

وحشتوني

أول كلامي وحشتوني.....بعد اجازة استمرت 40 يوم أنا راجع وكلي شوق ...اكتب ...أحكي...أقول ....أدوب من تاني في وسطكم......وحشتوني

شرم الشيخ

البقاء لله .........في الضمير والكرامة والإيمان والانتماء.............. الحزن ماليني بالرغم من الإرادة القوية على الصمود والإيمان بقضاء الله................. بس بجد مافيش نفس للكلام. يا خسارة يا مصريين

البحر بيضحك ليه
وانا نازله ادلع املا القلل

البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل

مساكين بنضحك من البلوة
زي الديوك و الروح حلوة
سارقاها من السكين حموة
و لسة جوا القلب أمل


والبحر بيضحك ليه … ليه
وانا نازلة ادلع املا القلل

من قصيدة نجيب سرور

مصر مش كده

عشان خاطر مصر وعيون مصر وعشان نرد على الإعلان التسويقي المادي الاناني المغاير للحقيقة...كتبت هذه القصيدة ويا رب تعجبكم

مصر مش كده


من جوة جرن القمح هاتي الصور يا وداد
بقى ليها عازة وفرجي الأولاد

الصورة دي بهية والنهار نهارين
واحد في منديلها والتاني جوة العين
والعين بصيرة وكلنا عارفين
بس الأيادي لسة برضه شداد

من جوة جرن القمح هاتي الصور يا وداد
بقى ليها عازة وفرجي الأولاد

بعد الكلام اللي تقال ف التلفزيون
عن البكيني وغطّيني وعن ناس بقروون
لو مستمع طبعا عاقل ح يقول ده جنون
ولا يرضى مصر تكون بيعة ف ايدين أوغاد

من جوة جرن القمح هاتي الصور يا وداد
بقى ليها عازة وفرجي الأولاد

بقى دي يا ناس مصر الحرة بنت الثورة
ليه بس عايزين يبيعوكي للناس برة
ده أنت الأميرة وعارفينك كل الامرا

و كفاية بس نجيب سيرتك النور ينقاد

من جوة جرن القمح هاتي الصور يا وداد
بقى ليها عازة وفرجي الاولاد

مصر الجميلة ف عيوننا احلى ما فيها
قلوب تسبح بخالقها واللي حاميها
يا رب احرس لنا بارك الخير ليها
واجعل نهارها ولياليها كلها أعياد

من جوة جرن القمح هاتي الصور يا وداد
بقى ليها عازة وفرجي الاولاد

Eskandrani July 2005

كوندوليزا

خطوة عزيزة يا كوندوليزا
مبعوثة الوالي الهمام
يا فايتة منغير حتى فيزا
ودايسة على الراس والمقام


فرحنا لما قالولنا جاية
كنسناهالك رشينا مية
والكل وطى باس واستغطى
حتى المعارضة حيوا المدام

دستور يا حراس القام

الخطة ماشية زي الاوامر
ح نشيل حمادة ونحط تامر
ولو حد فكر أو حتى غامر
ح نسد بقه من غير كلام

دستور يا حراس القام

دستورنا لازم ح ندرسوا
ح نقللعوا ونلبسوا
والشعب لو ثار نحبسوا
ونهرسوا تحت الترام

واهو نبقى خففنا الزحام

دستور يا حراس القام

والشعب حر يهتف ينادي
واحنا طبيعي لازم ندادي
واما تشاوري ح نجيب مغاوري
ونلم فيهم زي الحمام

ونعيش سعادة ونعيش سلام


أصحوا يا حراس المقام
أصحوا يا حراس المقام


اسكندراني - يونيه 2005

حد فاهم أي حاجة؟

حد فاهم أي حاجة م اللي داير؟
حد واخد باله ايه بس اللي صاير
حبة يمشوا ع اليمين
حبة مش متأكدين
والأكادة آه يا سادة
شعبنا هو اللي حاير

حد فاهم أي حاجة م اللي داير؟


دولا دولا مش عاجبهم
أما دولا ايه اللي جابهم
آه ودول أيدهم ف جيبهم
مرصوصين زي الشكاير

حد فاهم أي حاجة م اللي داير؟


عايز أبقى ويا حد
حد سامع ؟ حد رد؟
حد حب مصر جد
مش كلام في الجو طاير

حد فاهم أي حاجة م اللي داير؟


أحنا مش بنقول كفاية
برضه مش ويا الولاية
فهمونا أيه الحكاية
واحنا ح نسّوي الهوايل


حد فاهم أي حاجة م اللي داير؟

يونيو 2005

قصيدة قرد وأسد

القرد قرد لو له بلــــــــــــد
مهما انجـــعص ولا انفــرد
ح يعيش جبان جوة الببان
ويموت وعقــــــــدته الاسد

ماهو اصله قرد ومش أسد

الموز أساس لمـــــــــــبدأه
يندغ وقـشـــــره يفــــرقه
ياكل كتير ويعيش أمــــير
وكأنه عـايش للأبــــــــــد

مع انه قرد ومش أسد

قالوا زمان عليه حكــــــــيم
عالم ويفتي ف الصمــــــيم
ويقول كلام عنتر همـــــــام
صادر بمرسوم معتـــــــــمد

ماهو اصله قرد ومش أسد


اصل الحقــــــيقة المزهلة
انه اتربــــط في السلسلة
مالهوش خيار في الاختيار
مزلول بـــيستنى المـــــــدد

ماهو اصله قرد ومش أسد


ملعون ابوه من انهي ملة
ومنين جابوه ابن الغوريلا
ما سألنا حد غير قال ورد
ايش جاب لجاب قرد وأسد

عايزيين أسد.. عايزيين أسد

سنة تانية كتابة

في ليل مجروح ونور غايب
في وسط الضلمة صوت الآه
بيـــــنده قـلبي ع الغــــــايب
ترد الـتـــوهة مـش لاقيـــــاه
يعود الصوت يقول قـلـــــبي
ما شوفـتـش حد غيري ناداه
يرد الصـــــــوت ولا يخبي
يا قلبي مـسـتــــــحيل تلقاه

حبيب القلب انا مجروح
وامتى تـنــتهي جروحي
سنين فاتت سنين بتروح
ومشلاقي حبيب روحي
سنين ضاعــت وانا لسه
معـــــاه تايه بلا مرسى
وليه توعـــــد وليه تبعد
وليه تعـــــند وليه تأسى

وليه يا دنيـــــــــا فراقة
حرام دي قلوبنا مشتاقة
وبحلم يوم ما نتـــــلاقى
يكون بينــــا أمل وحياه

يا قلبي حرام ما تتـــــــــكلم
وقولها بأعلى ما ف صوتك
وايه ذنبــــك بتتــــــــــــــألم
وتبكي حتى ف سكــــــوتك
وهــو بعــــــــيد ولا داري
ولا عايز يعـــــــــود داري
تـزيد ناري وأفكــــــــــاري
وابات واصحى في حيرة وآه

وليه يا دنيـــــــــا فراقة
حرام دي قلوبنا مشتاقة
وبحلم يوم ما نتـــــلاقى
يكون بينــــا أمل وحياه

1996

سنة أولى كتابة

لملمي كفوفك وضمي جوة قلبك قلبي انا
وافتحي عيونك وسمّي ده الطريق مرسوم لنا

لملمي كفوفك تعالي بالقى في كفوفك حنان
خللي نور قمرك يلالي حتى لو فات الاوان
الهوا مكتوب علينا
متقوليش انه بايدينا
لو بعدنا او نسينا
برضه احنا لبعضنا

ضللي علينا وخدينا وارحمينا م العذاب
غيري النظرة الحزينة أأمري امرك مجاب
امسحي الدمع ف عيونك
ارفضي الشك وظنونك
قلبي عمره ما كان يخونك
لو تغيبي مييت سنه

لملمي كفوفك وضمي جوة قلبك قلبي انا
وافتحي عيونك وسمّي ده الطريق مرسوم لنا

1995

بقرة حاحا – أحمد فؤاد نجم

ناح النواح والنواحه على بقرة حاحا النطاحه

والبقره حلوب حاحا تحلب قنطارحاحا

لكن مسلوب حاحا من أهل الدارحاحا

والدار بصحاب حاحا وحداشر باب حاحا

غير السراديب حاحا وجحور الديب حاحا

وبيبان الدارحاحا واقفين زنهارحاحا

وف يوم معلوم حاحا عملوها الروم حاحا

زقوا الترباس حاحا هربوا الحراس حاحا

دخلوا الخواجات حاحا شفطوا اللبنات حاحا

والبقرة تنادي حاحا وتقول يا ولادي حاحا

وولاد الشوم حاحا رايحين فى النوم حاحا

البقرة إنقهرت حاحا فى القهر إنصهرت حاحا

وقعت فى البيرحاحا سألوا النواطير حاحا

طب وقعت ليه حاحا وقعت م الخوف حاحا

والخوف ييجي ليه حاحا من عدم الشوف حاحا

وقعت م الجوع ومن الراحه البقرة السمرا النطاحه

ناحت مواويل النواحه على حاحا وعلى بقرة حاحا

مسير الضي لوحده هيلمع

إهداء إلى روح نابغة السينما المصرية .. النمر الأسود ..... أحمد ذكي ..... " مسير الضي لوحده هيلمع" من فيلم هيستريا وهذه الكلمات للشاعر فؤاد حداد

ان ماعرفتش تضحك

ماتدمعش.. و لا تبكيش

و ان مافضلش معاك غير قلبك

اوعي تخاف مش حتموت..هتعيش

و ان سالوك الناس عن ضي

جوه عيونك مابيلمعش..ماتخبيش

قولهم العيب مش فيا ده العيب في الضي

و انا مش عاشق ضلمه و لا زعلت الضي

مسير الضي لوحده هيلمع

مسير الضحك لوحده هيطلع

مابـيجرحش و لايأذيش

قصيدة للشاعر نجيب سرور

?!!لم يعد هناك أي مساحة من الثقة لبائعي الكلام ...وما اكثرهم هذه الايام ... فهل من فارس

قد آن يا شاعر للقلب الجريح أن يستريح

فاحفر هنا قبراً ونم وانقش على الصخر الأصم

يا نابشا قبرى حنانك ، ها هنا قلبٌ ينام

لا فرق من عامٍ ينامُ وألف عام

هذى العظام حصاد أيامى فرفقاً بالعظام

أنا لست أُحسب بين فرسان الزمان إن عد فرسان الزمان

لكن قلبى كان دوماً قلب فارس كره المنافق والجبان مقدار ما عشق الحقيقة

قولوا " لدولسين " الجميلة أَخْطَابَ قريتى الحبيبة

هو لم يمت بطلاً ولكن مات كالفرسان بحثاً عن بطولة

لم يلق فى طول الطريق سوى اللصوص ،

حتى الذين ينددون كما الضمائر باللصوص

فرسان هذا العصر هم بعض اللصوص

بروطا و أنتاخا

اللي خالاني اكتب ده هو دراسة ظاهرة مح مح & زوزو وعشان كده ح ابدأ بالقصيدة دي " اهروشيلي ضهري"

اهروشيلي ضهري........ الغسيل ف حجري
يعني أموت يا زوزو........حاضر جاية دوغري

فين ياحبيبتي حاجتي ..والشراب ولبسي
هو انا مخي دفتر ...........إنتي لحقتي تنسي
مح مح أصلي حبلة........... البس أي بدلة
ده اسمه كلام يا زوزو.... أيوة انا جبت اخري
اهروشيلي ضهري

ما تشوفيه يا سوسو ........مانت برضه امه
ولا انا بس يعني.......... اللي اشيل ف همه
ايه يا ست زوزو...... سيبي الواد ف حاله
طول اليوم يا روحي.... جوة الشغل مهري
اهروشيلي ضهري


ايوة ومين ح يشهد...غيرك للعروسة
اطبخيله بامية ....... ولا محشي كوسة
حضريله ياكل .... مش عايزين مشاكل
المهم هو..........مش حاسيين بعذري

اهروشيلي ضهري

إيه يعني

لو تضرب دنيتنا وتقلب
أو تولع فيها وإيه يعني
لو تغرق أحلامنا ف مركب
أو حوت يبلعها وإيه يعني
******
إيه يعني ح يتغير فينا
أو حتى ح يفرق ويجيينا
لا القرد ح يتجوز نملة
ولا حد ح يقدر ينفعني
******
متشائم انا سلبي كمان
خايف متوتر وجبان
أنا حر يا سيدي ولا مؤاخذة
لو باكل عندك امنعني
******

وعموما انا ح امشي بعيد
مبسوط ومزقطط وسعيد
لو شوفتني واقع ف جهنم
مش عايزك تييجي تطلعني

راح أموت؟؟ طيب إيه يعني

مايو 2005

موضوع جديد

بما ان النهاردة آخر الأسبوع.. إيه رأيكم في تناول موضوع مهم جداً واللي أحب اسمع رأي كل واحد فيكم بدون كسوف ولا زعل .........اللي خايف يكتب اسمه ممكن يستخدم اسم مستعار.

الموضوع يا جماعة هو " هل الجواز وما يحتويه من أمور حلوة ومش حلوة وبما أن أي جواز مكون من طرفين......... هل الجواز ممكن يكون في مصلحة طرف على الآخر؟ يعني هل ممكن حد يستفيد أكتر من حد؟
......... سمّعنا صوتك

يا مصر

فلاحينك هما هما

فلاحين رمسيس وخوفو

جيش لا عيش ولا زمزميه

فى الهجيره تبل جوفه

المرض للموت يجرة

وهو ماشي يجر خوفه

أعمي سالك سكه عتمه

خطوته على قد شوفه

أحمد فؤاد نجم.......

الساهرة اليوم

ساعات الواحد بيتفوق على نفسه لما بيعمل حاجة فوق العادة وطبعاً ف اغلب الاحيان بيحس نفسه عنتر .......... وح نروح بعيد ليه ، كعادته الشاب الوسيم صاحب الشخصية المحبوبة جداً مرمر بيه بطل احد البرامج الشهيرة على اوربيت فجّر قنبلة من قنابله اياها بس مش زي بتاعة ميدان عبد المنعم رياض - اللي ما سمعناش عنها أي حاجة مفيدة من اولي الامر لغاية دلوقت – لانها ما ضربتش ميدان بس .. دي ضربت الدنيا كلها واللي افترض فيها شيء لا يقبله عقل قطة حتى............ نهايته انا من هنا ابعث هذه الابيات الصغيرة علّه يعد لحد عشرة قبل ما يطرح أي موضوع تاني:

أوربت عندك وقّف يا اسطى
خطوة كمان وح تبقى ألسطة
البيه مرمر عـــــــامل عـــنتر
وبـيتمخـــتر زي البــــــــــطة

اوربت يا اسطى

قطر ودايــــس من غــــير آخر
لو مش عاجبك .. أوعى اتاخر
حاجة عجيبة لأ دي مســــــاخر
خيبة وصـــــــابت كده بالدستة

اوربت يا اسطى

عايز تشـــــطح يبقى تقـــــول
حاجـة مفـــــــــيدة وبالمـعقـول
حاجة الناس تلقى لها حـــــلول
ليها مكان معروف ع الخارطة

اوربت يا اسطى

أما حســــين ف ده راجل جد
مش محتاج شهادات من حـد
بص كلامه شوفــــــــــت الرد
دكتور.. عالم من غير واسطة

اوربت يا اسطى

وسلام يا أوربت............

لست أدري

لست ادري دي اغنية حليم من اازمن الجميل اللي كان اولويات الناس فيه انها تنبسط وتضحك على اي حاجة حتى على "مرة واحد حب يقعد على قهوة قعد على شاي"يمكن يكون الوقت كان فاضي بشكل كان يسمح بكده وده خلى الناس عندها مساحة لاحتمال الاخر عندها استعداد تسمع بعض... تحكي لبعض.... تضحك على بعض........ دلوقتي بقى الناس بتكره بعض ...بتاكل ف بعض بتأذي بعض بتموُت بعض.ايه الي بيحصل ...... لست أدري

كانوا بيفكروا في ايه

كنت بتفرج على برنامج اجنبي امبارح بعد ما اتغمت نفسي من اخبار مصر واللي حصل فيها، بالمناسبة البرنامج اسمه " كنت بتفكر في ايه وانت بتعمل كده" حاجة كدة شغل امريكاني بس ولله عندهم حق وممكن يكون من المرات القليلة جداً اللي عندهم فيها حق......... ضرب ف دماغي سؤال مهم الاغبياء دول اللي عملوا كده في مصر كانوا بيفكروا في ايه ......... الواحد مش عارف ازاي اولع النار في بيتي اللي فيه ولادي واهلي كلهم ............ طيب وللعت فيها كلها ح تقعد مع مين؟

نهايته الواحد قرفان حتى يتكلم معاهم ونفسي الحكومة تاخد قرار جامد بقى وتنفي اللي عملوا واللي خططوا واهلهم ايوة اهلهم عشان هما السبب الاول في ده ...... دول ما يستحقوش يفضلوا على ارضنا يوم واحد.

???????? ???? ????? 

أول كلامنا

من كتر ما الواحد بعيد عنها حاسس اني بانسى كل حاجة فيها ......... وعشان كده حبيت اشرك كل محبيها معايا علشان نفكر بعض قولوا معايا ............. يا إسكندرية