Thursday, September 29, 2005

يا مصر

يا مصر

أما يا مصر صحيح غلبانة
يوم تتعشي وعشرة جعانة
وبتتغطي بناس بتوطّي
لما غرقتي في بحر خيانة

أما يا مصر صحيح غلبانة

أما يامصر عليكي حكومة .. غش ف غش
بتبدل في اليوم الواحد .. مليون وش
وبتستعبد ...شعبك تجلد
قهر وذل وخوف واهانة

أما يا مصر صحيح غلبانة

أما يا مصر عليكي رئيس.. مش متأخر
ان يسيب في كلابه تهيص ..وهو يشخر
لما الخير في ايديكي اتبخر
راح امريكا خدله اعانة

أما يا مصر صحيح غلبانة

لسه يا مصروشعبك ساكت...كاتم غلبه
امتى يا مصر ح يفهم ان بحقه يطالبه
خايف لاحسن نومه يغالبه
يصحى يلاقي الناس عريانة

اصحي يا مصر الناس نيمانة

أسكندراني سبتمبر 2005




7 comments:

KING TOOOT said...

أيه ده كله
جامده جامده بشده
أهنيك عليها ,, ممتازة و معانيها مباشرة ولكن المباشرة اللذيذة و الوضوح الذكى
ممتازة و اهنيك عليها مره تانية
KING TOOOT

eskandarany said...

كينج توت
من بعض ما عندكم يا افندم ....... شوف أنا مشكلتي اني اللي ب أحسّه ما اعرفش أقوله الا في شعر زي ده عشان كده انا قليل الانتاج بس تشجيع الناس ليا بيخلليني مولع وعايز اكتب واكتب واكتب ..........عموماً مشكور وعلى فكرة أنا قرييت اللي انت كاتبه وحقيقي هايل بالذات فى ذكرى رحيل الزعيم الخالد وكمان خائبون. وفي انتظار الجديد

rudi said...

لقد وقعت عينى على البلوج بتاعتك وقرأت اغلب ما بها وأعجبنى كثيرا ما تكتبه خاصةأننى أحس أن كل ما تكتبه محسوس أوى أوى :) أستمر يا أسكندرانى

Anonymous said...

eskandarany ..


تسلم على الكلمات الرررررررررروعة


واقع مؤلم حزين ندعو الله ان يتغير


وفقنا الله لما فية الخير

مع خالص تحياتى

SaSo said...

دى مصر منفضالك خالص

الاصحيح انت كنت عايز تصحيها ليه؟

Lasto-adri *Blue* said...

اصحي يا مصر الناس نيمانة

فعلا يا اسكندرانى... بس مين يسمع

يلا كل سنة وانت طيب

ياسمين حميد said...

تبقى غلبانة ازاي وفيها واحد بيكتب زيك
!!!!